قال تعويض أُسر الشهداء!! ..
دون التحقق عن من الذي قتلهم؟؟
ثم رئيس لجنة الأمن بالبرلمان: (سيارات بدون أرقام كانت تطلق النار على المتظاهرين ..
ثم .. صوِّب لتقتل، أمرٌ معمول به في أمريكا) ..
هرطقات القتلة.
نفير القدال .. مربوعات سلفت .. من أيام سبتمبر 2013م
----------------------------
أيام القاتل المجهول:
التاتشر ملان والدوشكا بى ترباسو
والولد المَـرَق من جامعتو وكراسو
المقتول مُعَرَّف، إسمو، أهلو وناسو
والجهلول منَشِّن، قصدو سدرو وراسو
---------------------------
أيام انتفاضة نيرتتي:
مرَقـَت نيرتِـتي ونَهَـضَـت مُسالمه تنادي
حباب زالنجا قـَمْـزات النمور في الوادي
عشرين ماتوا لا فوق شاشه لا فوق رادي
حكم ابْتـَكـُّو ضَرْب الخـوف وكـَتـْل السادي
--------------------------
أيام عدم الاعتراف بالشهداء:
جـِد لي أُمُّـو يا دوب الشهيد عـِـرفوهو
بعد السابعة تور الوالي جا وسَـمُّـوهو
سـمُّوهو الشهيد توب الشهادة كـَسُـوهو
هم نكروا السماية الحقـَّت امُّو وابوهو
---------------------
بعد السابعة تور الوالي جا وسَـمُّـوهو
سـمُّوهو الشهيد توب الشهادة كـَسُـوهو
هم نكروا السماية الحقـَّت امُّو وابوهو
---------------------
أيام بنات الأحفاد:
أخوان البنات شَـحَـنوا الدفافير بـيهـِـنْ
ماهـُـم مِـنـَّنا الكَـشَحوا الشَـتيمه عليهـِنْ
ولاهُـم دمَّـنا وسُـوطهم مَـلـَخ إيـديهـِنْ
لا دين لا خُـلـُق نَـكـِره ونَـزَل واديهـِنْ
-----------------------
أيام النُــــكران:
تـُب الشبـَّعوا الجيعان هموم ومغايس
وتـُب الحوًّلوا الأوطان أسود وكدايس
وتـُب الفرَّقوا الأموات شهيد وفطايس
وتـُب الجنة لو مفتاحها عند الخايس
----------------------
أيام الغدر:
وادعنا الشهيد قـبَّل على الباريهو
ضَمضَم جمعنا ورفع الصمود ساريهو
ناقص الدين غدربو وفات سَدَر في تيهو
والفيهو النَّـقَـَاص لى آخرَتو يباريهو أمدرمان
-----------------------
أيام الغضب:
في ليل الغضب صبح الهتاف غُــنيه
ويا دم الشهيد رفرف على الدنيا
شوف أولاد مهيره الما دنوا الدنيا
الموت عندهم زي العرس .. منيه
-----------------------
أيام الصيد الحرام:
الناس مرقت دايرالها أمان
ما خايفه الموت شامَّـه البنبان
يا الما خايفين يوم الرحمن
بتصيدوا الناس صيد الغزلان؟؟؟؟
---------------------
في ذكرى هبة سبتمبر المجيدة 2013م
.jpg)
.jpg)
.jpg)
